Litlar vonir um aukinn þorskkvóta á næstu árum

Flest bendir til þess að 2007 stofninn af þorskseiðum sé álíka lélegur og stofnarnir frá 2004 til 2006. Það er því harla lítil von til þess að þorskkvótinn verði aukinn á næstu árum.

Þetta kom fram í rækjuleiðangri Hafrannsóknastofnunar þar sem aðrir stofnar voru jafnframt kannaðir. Niðurstöður af rækjumælingunum eru þær að engin rækjuveiði verður í fjörðum og á grunnslóð fyrir vestan og norðan land í vetur ef farið verður að ráðleggingum Hafrannsóknastofnunarinnar.

Reyndar hefur ekkert verið veitt á þessum slóðum að undanförnu og sumstaðar í allt að átta ár en vonir stóðu til að stofnarnir væru að rétta úr kútnum. Nýliðun rækju virðist að vísu góð í Ísafjarðardjúpi, Skjálfanda og Öxarfirði en vegna mikils ungviðis af öðrum tegundum, einkum ýsu, er ekki talið ráðlegt að hefja rækjuveiðar þar sem þær yrðu á kostnað ungviðisins.

Í rækjuleiðangri Hafrannsóknastofnunar var þorskur einnig kannaður og kom í ljós að minna var af smáþorski á rannsóknaslóðunum en áður.