Ofsagt að upptaka evru gæti útilokað ESB-aðild

Það er ofsagt að einhliða upptaka evru gæti útilokað aðild að Evrópusambandinu, segir Ragnar Arnalds, formaður Heimssýnar. Það geti vissulega flækt málin en útilokar ekkert.

Einn helsti sérfræðingur landsins í Evrópusambandsmálum, Eiríkur Bergmann Einarsson, forstöðumaður Evrópufræðaseturs Háskólans á Bifröst, sagði í fréttum Stöðvar 2 í gær að einhliða upptaka evru gæti útilokað Evrópusambandsaðild.

Ragnar Arnalds, formaður Heimssýnar, samtaka sem eru andvíg aðild, segir það ofsagt hjá Eiríki. Það gæti hins vegar flækt málin og slíkar vangaveltur hafi komið upp í tengslum við Svartfjallaland sem lengst af var með þýska markið, tók síðan einhliða upp evru og sækist nú eftir inngöngu.

Flækjan felist í því að til að ríki geti tekið upp evru í tengslum við ESB þarf það að uppfylla nokkuð ströng skilyrði um meðal annars, skuldastöðu ríkisins, fjárlagahalla og verðbólgu. Ríki sem tekur evruna upp einhliða - er auðvitað ekki háð þessum skilyrðum. Ragnar segir hins vegar að menn telji ekki að evruupptaka Svartfellinga muni koma í veg fyrir aðild.

Andrés Pétursson, formaður Evrópusamtakanna, sem berjast fyrir inngöngu í ESB, mótmælir líka orðum Eiríks. Einhliða upptaka gæti hins vegar skapað erfitt fordæmi, segir Andrés. Við uppfyllum flest skilyrði fyrir aðild að sambandinu, segir Andrés, hins vegar uppfyllum við ekki skilyrði fyrir evruna eins og er.