Vill auðvelda fólki að hætta að reykja

Sjö þingmenn úr Sjálfstæðisflokki og Samfylkingunni hafa lagt fram frumvarp sem felur í sér að þeir sem selja tóbak í smásölu fái heimild til sölu nikótínlyfja sem ekki eru lyfseðilsskyld. Það er Katrín Júlíusdóttir, þingmaður Samfylkingarinnar, sem er fyrsti flutningsmaður frumvarpsins.

Í greinagerð með frumvarpinu kemur fram að markmiðið með því sé að fjölga sölustöðum nikótínlyfja þannig að þau verði valkostur í stað tóbaks þar sem það er selt. Nikótínlyf sem seld eru í lausasölu eru í formi tyggigúmmís, plásturs, innsogs- og nefúðalyfs. Með frumvarpinu er ekki gert ráð fyrir að nikótíntöflur sem einungis fást gegn framvísun lyfseðils og verði seld annarsstaðar en í apótekum.

Í samtali við Vísi sagði Katrín að sér þætti mjög einkennilegt að heimilt væri að selja tóbak og tjöru í verslunum en ekki mætti selja nikotínlyfin við hliðina á þeim. „Þeir sem vilja hætta að reykja verða að hafa lyfin við hliðina á tóbakinu í búðinni," segir Katrín. Hún leggur mikla áherslu á að sala lyfjanna muni lúta sömu reglum og sala tóbaks samkvæmt frumvarpinu. Katrín segir að þeir sem starfi að forvarnarmálum, svo sem læknar, telji þetta frumvarp jákvætt

Þetta er í þriðja skipti sem Katrín leggur frumvarpið fram en það fékk ekki efnislega afgreiðslu í fyrri skiptin. Katrín telur að líkurnar á því að málið verði afgreitt nú séu góðar. „Ég treysti því að heilbrigðisnefnd muni fara vel yfir þetta mál og það muni skila sér þaðan," segir Katrín. Hún bendir á sex aðrir þingmenn úr báðum þingflokkum flytji málið með sér og vonast til að það auki líkurnar á því að málið verði afgreitt.