Ríkið sjái um hjónavígslur á Norðurlöndum

Ríkið á að sjá um hjónavígslur, ekki kirkjan, og tryggja verður samkynhneigðum sama rétt og gagnkynhneigðum. Þetta er mat Norðurlandaráðsþings æskunnar sem haldið var í Osló í gær en á því eiga sæti fulltrúar ungliðahreyfinga stjórnmálaflokkanna á Norðurlöndum.

Í ályktun frá Norðurlandaráði æskunnar segir enn fremur að nauðsynlegt sé að norrænu ríkin sýni samstöðu og veiti samkynhneigðum sömu réttindi og gagnkynhneigðum og vinni gegn fordómum. Mikilvægt sé að samkynhneigðir fái að ættleiða börn og þá eigi ríkið en ekki kirkjan að vígja bæði gagnkynhneigða og samkynhneigða til sambúðar.

Fram kemur í tilkynningu frá Norðurlandaráði að Páll Heimisson frá Sambandi ungra sjálfstæðismanna hafi lagt fram tillöguna og hlaut hún mikinn stuðning meðal fulltrúa á Norðurlandaráðsþinginu.