Með tófu sem húsdýr

Fjölskyldan að Goðatúni 4 á Flateyri hefur frá því í vor haft nokkuð óvenjulegt húsdýr en það er tófan hún Birtan.

Kristján Einarsson er grenjaskytta. Hann hefur stundum tekið yrðlinga með sér heim á vorin og haft yfir sumartímann. Í vor tók hann heim með sér tófuna Birtu sem var í greni skammt frá bænum.

Birta hefur vakið mikla lukku hjá börnum á Flateyri sem hafa ósjaldan heimsótt hana og leikið við hana. Um helgina ákvað Kristján að sleppa Birtu skammt frá bænum og merkti hana svo hægt væri að þekkja hana ef það sæist til hennar. Frelsið höfðaði hins vegar lítið til Birtu sem var mætt heim strax morguninn eftir.