Færsla hringvegar í Hrútafirði boðin út

Krappa beygjan við Brú verður tekin af og hringvegurinn lagður norðar og ný brú smíðuð yfir Hrútafjarðará skammt frá ósum. Leiðin milli Vestfjarða og Norðurlands styttist um átta og hálfan kílómetra en leiðin milli Reykjavíkur og Akureyrar lengist um 500 metra. Færsla vegarins þýðir að Staðarskáli fer úr alfaraleið. Eigendur bregðast við með því að byggja nýjan og stærri skála handan Hrútafjarðarár á túni skammt vestan nýrra gatnamóta við veginn norður Strandir. Stefna þeir að því að nýi skálinn verði tilbúinn um leið og nýi vegurinn, eftir eitt ár. Gamla Staðarskála verður þá lokað sem og skálanum við Brú.