Stjörnulögfræðingur ver íslenska konungskúgarann

Annar mannanna sem er í haldi bresku lögreglunnar vegna fjárkúgunarmáls sem tengist bresku konungsfjölskyldunni er af íslenskum ættum. Tveir menn voru leiddir í gildru lögreglu og handteknir þegar þeir reyndu að fá 50 þúsund pund fyrir að birta ekki kynlífsmyndband af meðlimi konungsfjölskyldunnar.

Maðurinn sem í dag gengur undir nafninu Ian Strachan er þrítugur og vel þekktur í skemmtanalífinu í London. Hann býr með móður sinni í Chelsea en á íslenskan föður. Ian var skírður Paul Einar Ian Adalsteinsson en breytti nafni sínu þegar foreldarar hans skildu.

Þessi hálf íslenski fjárkúgari bjó lengst af í Aberdeen á Skotlandi og er sagður stunda viðskipti. Mennirnir voru handteknir þann 11.september og er það stjörnulögfrðingurinn Giovanni Di Stefano sem er verjandi okkar manns.

Stefano þessi er hvað þekktastur fyrir að hafa varið Saddam Hussein, Slobodan Milosevic og aðra þekkta kappa.

Ekki hefur komið fram hvaða meðlimur konungsfjölskyldunnar var á myndbandinu, en staðfest hefur verið að Harry og Vilhjálmur komu þar hvergi nærri.