Staðfestir farbann yfir manni í Hraunaveitumáli

Hæstiréttur hefur staðfest farbannsúrskurð Héraðsdóms Austurlands yfir Letta sem tengist rannsókn efnahagsbrotadeildar Ríkislögreglustjóra á kæru á hendur starfsmannaleigunni NCL og GT verktökum.

Það var Vinnumálastofnun sem óskaði eftir því að lögregla rannsakaði hvort gögn frá GT verktökum um launakjör nokkurra Letta sem störfuðu hjá verktakanum við Hraunaveitu Kárahnjúkavirkjunar væru rétt. Lettarnirnir leituðu til Afls starfsgreinafélags og kærði Afl málið til lögreglunnar.

Vildi Afl að lögregla rannsakaði hvort Lettarnir hefðu á einhvern hátt verið neyddir með ólögmætum hótunum til að skrifa undir skjöl þess efnis að þeir hafi móttekið mun hærri launagreiðslur frá GT verktökum en þeir hefðu í raun og veru gert.

Samkvæmt lögregsluskýrslu var sá sem úrskurðaður var í farbann annar þeirra sem sá um að afhenda starfsmönnunum laun sín og láta þá kvitta fyrir móttöku á umrædd skjöl. Segir í farbannsúrskurðinum að hann hafi því mögulega gerst sekur um lögbrot.

Enn fremur kemur fram í farbannsúrskurðinum að rannsókn málsins sé nú vel á veg kominn og að lögregla hafi lokið yfirheyrslum yfir 13 vitnum í málinu. Yfirheyrslum yfir manninum sem úrskurðaður var í farbann sé ekki lokið og enn eigi eftir að bera undir hann gögn sem hafi grundvallarþýðingu í málinu. Þá eigi eftir að yfirheyra a.m.k. tvo aðila sem séu undir grun í málinu og líklegt sé að bera verði framburð þeirra undir kærða. Nauðsynlegt sé að tryggja nærveru kærða til að geta upplýst um brot þau sem honum hafi verið gefin að sök.

Héraðsdómur Austurlands féllst í síðustu viku á farbann yfir manninum en hann leitaði til Hæstaréttar sem staðfesti úrskurðinn. Farbann yfir manninum gildir til 6. nóvember.