Stjórnvöld hemji gjaldtöku bankanna

Stjórnvöld verða að grípa inn í og hemja gjaldtöku bankanna, að mati Jóhannesar Gunnarssonar, formanns Neytendasamtakanna. Hann segir fámennið og krónuna hindra erlenda banka í að koma til Íslands.

Þorvaldur Gylfason hagfræðiprófessor sagði í fréttum í gærkvöldi að einkavæðing bankanna hefði mistekist og að vaxtamunur á Íslandi hafi aukist eftir einkavæðinguna. Menn hafi ekki gætt þess að tryggja harða samkeppni.

Formaður Neytendasamtakanna tekir undir þetta og segir vaxtamun og gjaldtöku bankanna of mikinn. Hann segir bankamarkaðinn fákeppnismarkað. Fyrirtækin séu ekki að keppa í kjörum gagnvart hinum almenna viðskiptavini heldur fyrst og fremst að byggja í kringum sig einhverja ímynd.

Bankarnir hafa oft á síðustu árum verið gagnrýndir fyrir að veita viðskiptavinum of lága vexti af innistæðum en rukka of háa vexti af lánum. Síðast þegar þessi umræða blossaði upp síðastliðinn vetur, sagði bankastjóri Landsbankans rangt að vaxtamunur hér sé hár.

Jóhannes segir fjölmargar skýrslur sýna annað. „Að sjálfsögðu slær það íslenskan almenning verulega að á sama tíma eru þeir alltaf að slá met í hagnaði. Hvaðan kemur þessi hagnaður? Ég held að töluverður hluti hans eigi rót sína að rekja til viðskipta við Íslendinga," segir Jóhannes. Hér á að ríkja frjáls samkeppni, segir Jóhannes, en hún þarf að vera virk.