Spyr hvort ekki sé kominn tími til að skipta krónunni út

Starfsgreinasamband Íslands spyr hvort ekki sé kominn tími til að skipta yfir í alvöru gjaldmiðil fyrir íslenskt launafólk ef ekki er hægt að treysta krónunni. Tilefni þessarar spurningar eru nýjustu tíðindi í evrumálum en eins og kunnugt er hefur Kaupþing ákveðið að skrá hlutabréf sín í evrum.

Í grein á heimasíðu Starfsgreinasambandsins segir Skúli Thorodsen, framkvæmdastjóri sambandsins, að hagkerfið á Íslandi sé fjórklofið. „Svarta hagkerfið, verðtryggða krónuhagkerfið, óverðtryggða krónu- og okrarahagkerfið og loks evruhagkerfi viðskiptalífsins sem þarf að eiga ábyggileg samskipti við útlendinga í útlöndum Við spyrjum því enn; Er ekki kominn tími til að skipta líka yfir í alvöru gjaldmiðil fyrir íslenskt launafólk, - ef við getum ekki lengur treyst krónunni?"

Skúli bendir á að Starfsgreinasambandið hafa fjallað ítarlega um evrumálið á þingi sínu í byrjun október og í sérstakri ályktun um málið hafi verið bent á að mikilvægt væri að kann hvort aðild að Evrópusambandinu og upptaka evru þjóni hagsmunum Íslands. ,,Það þarf að skilgreina kostina og gallana og gefa fólki tækifæri til að átta sig á því hvað muni breytast við mögulega inngöngu. Það verður að vera verkefni ríkisstjórnarinnar á yfirstandandi kjörtímabili," segir í ályktuninni og ítrekar Skúli þá körfu.

„Við viljum spilin á borðið en ekki láta viðskiptalífið taka upp evru án samráðs við kóng eða prest og að eigin frumkvæði. Innganga í Evrópusambandið og upptaka evru hefði í för með sér margþættan ávinning en í því felst einnig óvissa sem þarf að ræða og taka málefnalega afstöðu til, þótt í reynd sé meira sé vitað um ávinninginn af ESB-aðild en um mögulegar neikvæðar afleiðingar hennar," segir Skúli Thoroddsen enn fremur.