Meirihluti fylgjandi því að gefa ekki út hvalveiðikvóta nú

Tveir af hverjum þremur eru sammála þeirri ákvörðun Einars K. Guðfinnssonar sjávarútvegsráðherra að gefa ekki út kvóta til hvalveiða fyrr en markaðsaðstæður fyrir hvalkjöt hafa batnað.

Þetta kemur fram í skoðanakönnun sem Gallup gerði fyrir Náttúruverndarsamtök Íslands og International Fund for Animal Welfare í fyrri hluta októbermánaðar. Nærri 23 prósent eru ósammála ráðherranum og ellefu prósent tóku ekki afstöðu.

Í tilkynningu frá Náttúruverndarsamtökum Íslands segir niðurstöðurnar sýni að meirihluti almennings telji að markaður fyrir hvalkjöt sé ekki fyrir hendi og því tilgangslaust að halda áfram hvalveiðum.

„Sú staðreynd að einungis 7 hrefnur voru veiddar af 30 til veiða í atvinnuskyni talar sínu máli. Veiðarnar borga sig ekki. Hvalaskoðun er margfalt hagkvæmari fyrir þjóðarbúið en hvalveiðar eru. Í ár fóru yfir 100 þúsund ferðamenn í hvalaskoðun og ætla má að tekjurnar hafi numið 1,5 milljarði króna," segir í tilkynningu Náttúruverndarsamtakanna.