Skógræktarfélag Íslands og Kaupþing í víðtækt samstarf

Skógræktarfélag Íslands og Kaupþing hafa gert með sér þriggja ára samning um samstarf sem sagður er einn sá stærsti og umfangsmesti Skógræktarfélagið hefur gert við fyrirtæki.

Fram kemur í tilkynningu frá Skógræktarfélaginu að í samningnum felist margs konar stuðningur, til að mynda verður fræðslutarfs félagsins eflt til muna og er gert ráð fyrir sérstökum fræðsluvef á heimasíðu Skógræktarfélags Íslands, www.skog.is, þar sem hagnýtum upplýsingum og fræðslu um skógrækt og ræktun verður komið til skila.

Þá mun Kaupþing styrkja ýmsa fundi, skógargöngur, námskeið og aðra viðburði sem haldnir eru á vegum félagsins. Enn fremur hyggst bankinn áfram að vinna að uppbyggingu Aldamótaskóga, sem hafist var handa við að rækta árið 2000, en markmiðið er að gera Aldamótaskóga að aðgengilegum útivistarsvæðum fyrir almenning.