Héraðsdómur ósammála siðanefnd BÍ

Héraðsdómur Reykjavíkur sýknaði í dag fyrrum ritstjóra DV, Pál Baldvin Baldvinsson og Björgvin Guðmundsson, af kröfu framkvæmdarstjóra Heilbrigðiseftirlits Suðurnesja. Magnús H. Guðjónsson framkvæmdarstjóri fór fram á að ummæli sem um hann voru látin falla í blaðinu yrðu dæmd dauð og ómerk.

Frétt DV gekk út á að Magnús hefði beðið bréfbera í Reykjanesbæ að njósna fyrir sig. Njósnirnar gengu út á að kanna á hvaða heimilum fólk væri með hunda. Magnús viðurkenndi að hafa sent bréfberum bréf þar sem hann biður þá að skrá hjá sér á hvaða heimilum þeir yrðu varir við hunda.

Héraðsdómur kemst að þeirri niðurstöðu að blaðið hafi ekki farið út fyrir mörk tjáningarfrelsisins í frétt sinni eða að ummælin hafi falið í sér ólögmæta meingerð gagnvart stefnanda, eins og það er orðað í dómnum.

Þess má geta að Bergljót Davíðsdóttir fyrrum blaðamaður DV sem skrifaði um málið fékk á sínum tíma áminningu frá siðanefnd Blaðamannafélags Íslands.

Taldi siðanefndin, ólíkt Héraðsdómi, að Bergljót hefði ekki vandað upplýsingaöflun sína, úrvinnslu og framsetningu fréttarinnar.