Ásatrúarmenn kæra til Mannréttindadómstólsins

Ásatrúarmenn ætla að kæra niðurstöðu Hæstarétts frá því í dag til Mannréttindardómstólsins í Strassborg að sögn Hilmars Arnar Hilmarssonar, allsherjargoða. Hann segir niðurstöðuna vera vonbrigði.

„Það er verið að mismuna fólki eftir trúarskoðunum," sagði Hilmar Örn Hilmarsson, allsherjargoði, í samtali við Vísi. „Okkur finnst þetta ekki réttlætanlegt. Því ætlum við að fara með þetta mál til Mannréttindadómstólsins."

Hæstiréttur staðfesti í dag dóm héraðsdóms í máli sem Ásatrúarfélagið höfðaði á hendur íslenska ríkinu vegna sóknargjalda. Ásatrúarfélagið taldi jafnræðisreglu stjórnarskrárinnar brotna þar sem þjóðkirkjan fengi meiri greiðslur úr ríkissjóði en önnur trúfélög. Hæstiréttur komst hins vegar að því að þjóðkirkjunni væru falin lögbundin verkefni og því eðlilegt að hún fengi meira. Því var ríkið sýknað af kröfu Ásatrúarfélagsins.