Konur í miklum meirihluta brautskráðra frá HÍ á laugardag

Alls verða 400 manns brautskráðir frá Háskóla Íslands við hátíðlega athöfn í Háskólabíó á laugardaginn kemur. Þar af ljúka 111 meistaragráðu. Af meistaranemum eru tæplega 70 prósent konur, en af heildafjölda kandídata eru konur um 63 prósent en karla 37 prósent.

Heildarfjöldi brautskráðra kandídata frá Háskóla Íslands árið 2007 er þar með orðinn um 1800 talsins eftir því sem segir í tilkynningu Háskólans.

Að lokinni brautskráningu kandídata verður lýst kjöri heiðursdoktora sem að þessu sinni eru þrír. Þar næst veitir Kristín Ingólfsdóttir rektor viðurkenningar til starfsmanna fyrir lofsverðan árangur í starfi og ávarpar að því loknu kandídata. Dagskránni lýkur með söng Háskólakórsins undir stjórn Gunnsteins Ólafssonar.