Úithús fauk upp í fjall í Breiðdal

Útihús á bænum Randversstöðum í Breiðdal á Austfjörðum skemmdist mikið í veðurofsa sem gengið hefur yfir Austurland í dag.

Að sögn lögreglunnar á Fáskrúðsfirðir fauk allt þak útihússins upp í fjall og hefur ekki verið hægt að sækja brakið sökum hvassviðris. Hins vegar urðu ekki skemmdir á íbúðarhúsinu að Randversstöðum.

Þá fauk hluti af þaki svokallaðs Hilmishúss á Fáskrúðsfirði fyrr í dag en það er gamalt fiskvinnsluhús sem gegnir nú hlutverki geymslu. Voru björgunarsveitir kallaðar út til þess aðstoða við að festa þakið. Að sögn lögreglunnar á Fákskrúðsfirði hefur nú lægt aðeins en enn er mikið vatnsveður á þessum slóðum.

Sigurður Þ. Ragnarsson, veðurfræðingur á fréttastofu Stöðvar 2, segir að búast megi við áframhaldandi strekkingi fyrir austan og þá býst hann við því að það rigni áfram að minnsta kosti eitthvað fram á kvöld.