Geta ekki keppt við nýsjálenska bændur vegna ólíkra aðstæðna

Þótt íslenskir bændur fái hæstu styrki í heima en nýsjálenskir bændur nær enga styrki munu þeir íslensku aldrei geta keppt við starfsbræður sína á Nýja-Sjálandi, að mati hagfræðings Bændasamtaka Íslands. Íslenskir neytendur eygja þó von um verðlækkun á lambakjöti með afnámi útflutningsskyldu á næsta ári.

Erna Bjarnadóttir, hagfræðingur Bændasamtaka Íslands, bendir á að Nýsjálendingar búi við allt aðrar aðstæður en Íslendingar. „Þetta er grasræktarland, eitthvert besta í heimi, og þarna geta skepnur gengið úti árið um kring og bændur búa með mun stærri bú og hugsa öðruvísi um sinn bústofn," segir Erna.

Hún bendir á að hér sé hins vegar nánast einstaklingsumhyggja um hvert dýr og það þurfi að kosta miklu meira til í fóðuröflun og öllum aðbúnaði fyrir skepnur. „Við munum alla vega aldrei, hvað sem styrkjum líður, geta keppt við Nýsjálendinga í verði," segir Erna enn fremur.

Erna segir þó aðspurð að Íslendingar geti lært ýmislegt af Nýsjálendingum, til dæmis í rekstri afurðarstöðva og í markaðsmálum. Þá geti Íslendingar verið með stærri og hagkvæmari bú en á móti komi að Nýsjálendingar þurfi ekki hús fyrir öll dýrin. Þannig séu kýr geldar hluta af árinu og gangi úti.

Útflutningsskylda af lambakjöti sem lögð hefur verið á bændur verður aflögð á næsta ári og segir Erna aðspurð að það geti ekki annað en aukið samkeppni á kjötmarkaði. „Framleiðsla á lambakjöti er meiri en innanlandsmarkaðurinn tekur við, verðið er hins vegar hærra en útflutningsverð gefur þannig að það er eftir einhverju að slægjast að selja sem mest af kjötinu á þessum markaði," segir Erna og bætir við að það leiði væntanlega til verðlækkunar.