Haukur í Héraðsdómi á mánudag

Umdeildur eigendafundur í REI, þar sem samruni fyrirtækisins við Geysi Green Energy var samþykktur, verður tekinn fyrir í Héraðsdómi Reykjavíkur á mánudag. Svandís Svavarsdóttir, borgarfulltrúi Vinstri Grænna, kærði framkvæmd hans þar sem hann var ekki boðaður með löglegum fyrirvara. Ragnar H. Hall sækir málið fyrir hennar hönd.

Haukur Leósson, sem var stjórnarformaður Orkuveitu Reykjavíkur þegar fundurinn var haldinn, verður einn kallaður til vitnis.

Verjandi hans í málinu er Helgi Jóhannesson en hann var sem kunnugt er fundarstjóri á eigendafundinum. Þegar fundarmenn gerðu athugasemdir við fundarboð og þar með lögmæti hans úrskurðaði Helgi sjálfur fundinn lögmætan.