Ferja sigli átta sinnum á sólarhring milli Eyja og lands á sumrin

Bæjarráð Vestmannaeyja gerir kröfu um að ferja sem sigla á milli Eyja og Bakkafjöru sigli sex sinnum á sólarhring á veturna og átta sinnum á sumrin og að far- og farmgjöld taki mið að því að um þjóðveg sé að ræða. Bæjarráðið fundaði í dag þar sem rætt var útboð á slíkri ferju.

Telur ráðið afar mikilvægt að kröfur og óskir Eyjamanna liggi fyrir áður en rekstur og eignarhald verður boðið út. Í tilkynningu frá bænum kemur fram að gott samstarf hafi verið í málinu til þessa og að Vestmannaeyjabær hafi einsett sér að vinna áfram af fullum heilindum að þeim miklu samgöngubótum sem felast í nýrri ferju.

Samþykkti bæjarráðið minnisblað í dag undir nafninu „Sjónarmið Vestmannaeyjabæjar vegna fyrirhugaðs útboðs á hönnun, smíði og rekstri ferju milli Bakka og Vestmannaeyja“. Þar gerir bærinn meðal annars kröfu um að skipið beri 55 bíla og 350 farþega, frátafir verði ekki meiri en þær hafa verið í siglingum til Þorlákshafnar, ferðatíðnin verði ekki minni en 6 ferðir á sólarhring yfir vetrartímann og 8 á sólarhring yfir sumartímann og að fyrsta ferð verði ekki farin síðar en klukkan sjö frá Eyjum og seinasta ferð til Eyja sé um klukkan 23.

Þá vill bæjarráð að ekki verði samið við einn aðila um rekstur ferjunnar til lengri tíma en fimm ára og í 1-2 ár til að byrja með á meðan reynsla er að komast á þessar nýju samgöngur. Gengið sé út frá því að hafnarmannvirki og önnur mannvirki í Bakkafjöru verði í rekstri eigenda hafnarinnar, þ.e.a.s. sveitarfélaganna Vestmannaeyjabæjar (60%) og Rangárþings Eystra (40%).

Vilja forðast Grímseyjarferjuklúður

Elliði Vignisson, bæjarstjóri í Vestmannaeyjum, segir minnisblaðið unnið í samráði við sérfróða, þar á meðal skipstjórnendur á Herjólfi, reynda skipstjóra og sjómenn í Vestmannaeyjum. „Tilgangurinn er að varpa ljósi á sjónamið okkar heimamanna sem höfum áratugareynslu af notkun og þjónustu ferjusiglinga. Í ljósi þeirra mistaka sem gerð voru við endurbætur á ferju til siglinga til Grímseyjar teljum við verulega áríðandi að vilji okkar, kröfur og óskir komi skýrt fram," segir Elliði.

Stýrihópur starfar nú að málinu og segir Elliði að minnisblaðið hafi þegar verið sent honum og samgönguráðherra. „Ég á von á viðbrögðum frá þeim fyrr en varir. Líklegt þykir mér að í megindráttum verði orðið við kröfum og óskum okkar enda þær vel rökstuddar og útfærðar," segir Elliði.