Skilar sér í lækkun til neytenda

Formaður Neytendasamtakanna fagnar yfirlýsingu viðskiptaráðherra um afnám stimpil- og vörugjalda á næstu mánuðum og styrkingu neytendamála. Hann segist fullviss um að þetta skili sér í lækkun til neytenda.

„Ég fagna þessu útspili viðskiptaráðherra," sagði Jóhannes Gunnarsson, formaður Neytendasamtakanna, í samtali við Vísi. „Þarna er loksins tekið á gömlum draugum sem Neytendasamtökin hafa barist lengi gegn. Ég vona að þetta verði upphafið að betri tíð fyrir íslenska neytendur."

Björgvin G. Sigurðsson, viðskiptaráðherra, kynnti í morgun heildarstefnumótun á sviði neytendamála. Samkvæmt henni á meðal annars að leggja niður stimpil- og vörugjöld á næstu mánuðum og draga úr innflutningshömlum. Þá á ennfremur að tryggja að sjálftaka í gjaldtöku fjármálastofnana með seðilgjöldum eða vanskilagjöldum eigi sér ekki stað.

Jóhannes segist fullviss um að aðgerðir stjórnvalda skili sér í vasa neytenda. „Ég minni á að íslensk verslun hefur verið að kvarta undan þessum vörugjöldum lengi. Neytendur hafa svarað með því að kaupa tiltekna vöru í útlöndum. Ég sé því ekki fyrir mér að verslanir reyni að stinga þessum lækkunum í eigin vasa."

Jóhannnes fagnar ennfremur yfirlýsingu ráðherra um að taka eigi á gjaldtöku fjármálastofnana. „Það liggur fyrir að gjaldtaka banka og fjármálastofnana hér á landi er allt of há. Miklu hærri en gengur og gerist í nágrannalöndum okkar."