Vill banna kaup á kynlífsþjónustu

Kolbrún Halldórsdóttir, þingmaður Vinstri Grænna, mun í næstu viku leggja fram frumvarp um siðareglur fyrir opinbera starfsmenn í vinnuferðum erlendis. Í þeim verður lagt blátt bann við því aðp opinberir starfsmenn kaupi sér kynlífsþjónustu hvers konar.

Í samtali við Vísi sagði Kolbrún að sambærilegar reglur væru til staðar eða í vinnslu á hinum Norðurlöndunum.

"Siðareglur eru sjálfsagður hlutur fyrir fólk sem fer erlendis í umboði þjóðar sinnar," segir Kolbrún.

Hún segir að ríkisstarfsmenn í opinberum erindagjörðum eigi að fara fram með góðu fordæmi. Þeir eigi til að mynda að beina viðskiptum sínum frá þeim sem leggja blessun sína á klám og klámvæðingu. 

"Ég er til dæmis þeirrar skoðunnar að þeir sem eru í ferðum á vegum hins opinbera eigi ekki að eiga viðskipti við hótel sem bjóða upp á klámrásir," segir Kolbrún.