Miklir möguleikar í þorskeldi á Vestfjörðum

Bæjarstjórinn á Ísafirði telur mikla möguleika í þorskeldi á Vestfjörðum enda falli sú grein vel að þeirri þekkingu sem er til staðar á svæðinu. Vestfirðingar ætla að blása til sóknar í atvinnumálum með nýsköpun að vopni.

Fiskeldi er vaxandi atvinnugrein í heimum en á tæpum þremur áratugum hefur fiskeldi farið frá því að skila um 10 prósentum af heildar fiskmeti á borð neytenda á heimsvísu í að færa okkur rösklega fjörutíu prósent alls sjávarfangs sem neytt er í veröldinni.

Magnið sem kemur úr fiskeldi er um 45 milljónir tonna en heildarkvóti þorsks á þessu fiskveiðiári við Ísland er einungis 130 þúsund tonn.

Margir hafa orðið til að vara við gullgrafaræði tengdu þorkeldi hér á landi en Halldór Halldórsson, bæjarstjóri á Ísafirði, telur mjög mikla möguleika í þessari atvinnugrein.

Norðmenn hafa nú þegar náð góðum árangri í þorskeldi enda hafa þeir langa reynslu af laxeldi sem skilar sér í þessari nýju atvinnugrein. Ekki er enn sem komið er verulegur hagnaður af þorskeldi í Noregi en það magn sem kemur til slátrunar þar hefur smám saman farið vaxandi.