Ráðuneyti tefur lekaskýrslu

„Við eigum þessu ekki að venjast," segir Sigurður Þórðarson ríkisendurskoðandi, sem í hálft ár hefur beðið eftir upplýsingum frá utanríkisráðuneytinu um vatnsleka í íbúðum á varnarsvæðinu á Keflavíkurflugvelli.

Þegar Bandaríkjamenn fóru með her sinn frá Keflavíkurflugvelli í fyrrahaust yfirtók utanríkisráðuneytið umsjón ýmissa eigna á Keflavíkurflugvelli.

Stórtjón varð þar í miklum frosthörkum upp úr miðjum nóvember í fyrra þegar fjölmargar mannlausar íbúðir í fjölbýlishúsum á varnarsvæðinu skemmdust eftir að fraus í vatnsleiðslum og þær sprungu.

Fór svo að Valgerður Sverrisdóttir, þáverandi utanríkisráðherra, baðst afsökunar á tjóninu á Alþingi 22. nóvember. Sagði ráðherra að tjónið væri

mælt í tugum milljóna króna og að ríkið myndi bera kostnaðinn.

Daginn eftir afsökunarbeiðni sína fól Valgerður Ríkisendurskoðun að gera úttekt á umsýslu utanríkisráðuneytisins og stofnana þess og annarra aðila sem komu að eftirliti og umsjón með byggingum á varnarsvæðinu.

Fyrir um hálfu ári óskaði Ríkisendurskoðun eftir því að ráðuneytið gæfi vissar viðbótarupplýsingar sem lutu að stjórnsýslulegum þáttum. Svörin eru ekki enn komin og því hefur ekki verið hægt að ljúka við gerð skýrslunnar. Þó hefur Ríkisendurskoðun stöðugt rekið á eftir ráðuneytinu.

„Við höfum margítrekað beiðnina um upplýsingarnar á þessu tímabili," segir Sigurður Þórðarson sem kveður skilaboðin frá ráðuneytinu ávallt hafa verið þau að upplýsingarnar væru að koma. Þau skilaboð hefðu ekki

breyst.

„Staðreyndin er sú að við erum auðvitað mjög ósáttir við það að ráðuneytið hafi ekki svarað þessari beiðni okkar um þessar viðbótarupplýsingar," segir Sigurður sem játar því að hálft ár sé óvenjulega langur tími til að að bíða eftir slíkum gögnum. „Mjög svo,"

svarar hann en vísar að öðru leyti á utanríkisráðuneytið.

Hvorki Ingibjörg Sólrún Gísladóttir utanríkisráðherra né Grétar Már Sigurðsson ráðuneytisstjóri svöruðu skilaboðum Fréttablaðsins í

gær.