Hæstiréttur staðfestir farbann yfir Litháum

Hæstiréttur hefur staðfest farbann yfir tveimur Litháum sem taldir eru tengjast litháísku þjófagengi sem grunað er um stórfelldan þjófnað úr fjölmörgum verslunum á höfuðborgarsvæðinu.

Alls voru 15 Litháar handteknir í tengslum við málið snemma í mánuðinum og voru níu þeirra úrskurðaðir í gæsluvarðhald en fjórir í farbann. Mönnunum sem sátu í gæsluvarðhaldi var sleppt fyrir helgi en farið fram á farbann yfir þeim á meðan lögregla rannsakaði málið og tæki ákvörðun um það hvort sækja ætti mennina til saka.

Var farið fram á farbannsúrskurð yfir mönnunum til 1. nóvember og féllst héraðsdómur á það. Tveir mannanna undu ekki þeim úrskurði og leituðu til Hæstaréttar sem í dag staðfesti farbannið.