Gátu ekki tengst Leifsstöð vegna hvassviðris

Nokkrar tafir urðu á millilandaflugi í gær vegna hvassviðris og þá gekk urðu vélar að bíða í röðum eftir því að fá afgreiðslu við flugstöðina á Keflavíkurflugvelli. Þegar mest var náði vindhraðinn 27 metrum á sekúndu en öryggishámark á vellinum er 25 metrar á sekúndu.

Að sögn Friðþórs Eydals, upplýsingafulltrúa flugmálastjórnar Keflavíkurflugvelli, olli hvassviðrið því að ekki var hægt að nota alla landganga flugstöðvarinnar. Því þurftu vélar að bíða eftir afgreiðslu. Þegar mest var biðu fjórar vélar úti á stæði eftir því að tengjast flugstöðinni.

Guðjón Arngrímsson, upplýsingafulltrúi Icelandair, sagði í samtali við Vísi að nokkrar tafir hafi orðið á millilandaflugi. Um var ræða vélar sem áttu að fara til Bandaríkjanna síðdegis í gær. Brottför þeirra frestaðist um allt að klukkutíma.

Búist er við hvassviðri aftur í kvöld þótt ekki sé spáð álíka vindhraða og varð gær.