Bara tryggður fyrir tapi verði forsendubrestur af hálfu OR

Hjörleifur B. Kvaran, forstjóri Orkuveitu Reykjavíkur og Bjarni Ármannsson, stjórnarformaður Reykjavik Energy Invest hafa sent frá sér sameiginlega yfirlýsingu þar sem því er haldið fram að fullyrðing Moggans á forsíðu blaðsins í dag, um samning Bjarna við OR, sé röng.

„Fullyrðing Morgunblaðsins í dag um að í samningi Orkuveitu Reykjavíkur við Bjarna Ármannssonar, vegna aðkomu hans að Reykjavik Energy Invest felist „að hann gæti selt 500 milljóna króna hlut sinn, sem hann keypti upphaflega í REI, á genginu 1,278 aftur á sama verði ef hann kysi að hverfa frá félaginu," er röng," segir í yfirlýsingunni.

„Í áðurnefndum hluthafasamningi Orkuveitunnar og Bjarna Ármannssonar eru lagðar forsendur samstarfs þessara aðila. Þær varða stjórnarformennsku Bjarna í félaginu, inntöku nýrra hluthafa og breytingar á samþykktum þess," segir einnig, og því bætt við að „einungis ef forsendubrestur verður í samstarfinu af hálfu Orkuveitu Reykjavíkur, getur Bjarni Ármannsson átt þess kost að selja OR sinn hlut á kaupverði með verðbótum. Þessi skuldbinding fellur sjálfkrafa niður við áformaða skráningu REI á markað."

Þá segir að á fundi stjórnar OR í gær hafi verið tekin fyrir beiðni stýrihóps Reykjavíkurborgar um aðgang að gögnum vegna REI mála. „Ákvað stjórn OR að verða við beiðninni og var samningur OR við Bjarna eitt þeirra gagna sem starfsmanni stýrihópsins var látið í té í morgun."