Norðmenn segja Íslendinga falsa aflatölur

Samtök norskra útgerðarmanna hafa í bréfi til norska sjávarútvegsráðuneytisins dregið í efa að aflatölur íslenskra skipa á makrílveiðum í sumar séu réttar. Í það er látið skína að aflatölurnar hafi verið falsaðar til þess að koma Íslendingum að samningsborðinu við skiptingu makrílkvótans á milli strandríkja.

Vefsíðan interseafood fjallar um málið og vitnar í Fiskaren sem greinir frá því í dag að Ísland fari fram á að fá stöðu strandríkis hvað varðar makrílveiðarnar og hlutdeild í kvótanum í Norður-Atlantshafi en því hafi aðrar veiðiþjóðir hafnað.

Í bréfi samtakanna er dregið í efa að íslensk skip hafi veitt rúmlega 33 þúsund tonn af makríl á þessu ári eins og fram hafi komið í fréttum Fiskaren.

Makríllinn hafi verið veiddur sem aukaafli á síldveiðum og það hafi þjónað hagsmunum Íslendinga að gefa upp rangar aflatölur, hvort tveggja til að treysta stöðu sína hvað varðar hlutdeild í makrílnum og ekki síður til þess að drýgja síldarkvótann.