Hafa mánuð til að meta Jón nauðgara

Tveir matsmenn hafa verið dómkvaddir til að meta hvort Jón Pétursson, sem hefur fengið tvo fimm ára dóma fyrir nauðganir á skömmum tíma, sé í raun ósakhæfur. Þeir hafa rétt rúman mánuð til að meta Jón því seinna mál hans verður tekið fyrir í Hæstarétti 28. nóvember næstkomandi.

Matsmönnunum tveimur, sem eru geðlæknir og taugasálfræðingur, hefur verið falið að meta hvort skaði á framheila eftir slys sem Jón varð fyrir í Egyptalandi fyrir nokkrum árum hafi orðið þess valdandi að hann sé ósakhæfur.

Eins og áður sagði hefur Jón fengið tvo fimm ára dóma fyrir að nauðga á hrottafenginn hátt tveimur fyrrverandi sambýliskonum sínum. Fyrri dómurinn var staðfestur af Hæstarétti en áfrýjun þess síðari verður tekin fyrir eftir mánuð.