Einar vill ítarlega umræðu um kýrnar

Einar K. Guðfinnsson, sjávarútvegs- og landbúnaðarráðherra, segir mikilvægt að niðurstaða um að flytja inn nýtt kúakyn til Íslands verði ekki tekin í fljótfærni. Hann vill að bændur ræði málið á sínum vettvangi og komist að niðurstöðu sín í milli.

Í kvöldfréttum RÚV var greint frá því að framleiðslukostnaður mjólkur myndi lækka um 800-1250 milljónir króna á ári ef skipt yrði um kúakyn. Þetta eru niðurstöður rannsóknar Landbúnaðarháskóla Íslands en í henni voru íslenskar kýr bornar saman við norsk, sænsk og nýsjálensk kúakyn.

Einar segir að þessar niðurstöður séu ekki nýjar og rími við þær niðurstöður sem Fagráð í nautgriparækt hafi komist að. Hann segir ekki hægt að neita því að framleiðendur og neytendur myndu hafa ákveðinn fjárhagslegan ávinning af því ef skipt yrði um kyn.

Einar segist munu funda með kúabændum í kvöld um málið. Hann á einnig von á því að málið verði til umræðu á Alþingi þó það verði ekki endilega að hans frumkvæði.