Ríkið leggur rösklega 40% á öryggisfatnað sem bjargað getur mannslífum

Ríkið leggur ríflega fjörutíu prósent á öryggisfatnað bifhjólamanna í mörgum tilvikum. Þetta er búnaður sem bjargað getur mannslífum. Ný lög skylda ökumenn bifhjóla að nota öryggisfatnað, sem þó er enn óskilgreindur í lögum.

Engin viðurlög eru við brotum á nýju lögunum sem þýðir í raun að engin refsing er við því þótt bifhjólafólk aki á gallabuxum og peysu á meðan öryggishjálmurinn er til staðar. Ekki er heldur fullljóst hvað teljist öryggisfatnaður og hvað ekki því þetta er óskilgreint í lögunum.

Margir bifhjólamenn eru hlynntir öryggisfatnaði en þeim þykir óásættanlegt með öllu að ríkið skyldi ökumenn til að nota slíkan fatnað á sama tíma og það er að leggja verulegar álögur á fatnaðinn, bæði toll og virðisaukaskatt.

Valdís Steinarsdóttir, formaður Sniglanna - bifhjólasamtaka lýðveldisins, telur að aðflutningsgjöld á þennan fatnað séu ekki réttlát og ráði því að fólk kaupi frekar ódýran búnað í stað þess að velja það sem er öruggast. Þar með sé ríkið að beina bifhjólafólki frá því að nálgast þann búnað sem sé bestur.

Hlífðarflíkur bifhjólafólks eru nú tollflokkaðar sem venjulegur tískufatnaður. Hágæða bifhjólagalli, sem inniheldur bakbrynju sem talið er að geti komið í veg fyrir varanlegan mænuskaða, getur kostað allt að 70 þúsund krónur í innkaupum. Slík brynja hefur þegar sannað sig í tilviki Þórarins Karlssonar úr Keflavík sem slasaðist lífshættulega í vor þegar ekið var í veg fyrir bifhjól hans í Njarðvík. Þórarinn þakkar brynjunni að hann gangi í dag.

Tollur af galla með slíkri brynju er 15% komi hann frá löndum utan EES. Ofan á það bætist 24,5% virðisaukaskattur. Heildarálagning er því röskar þrjátíu þúsund krónur sem renna í ríkissjóð. Álagning ríkisins er því rösklega fjörutíu prósent sem sýnir að allstór hluti af kaupverði gallans rennur beint til ríkisins.

Ef varan er hins vegar framleidd innan EES er engin tollur á henni, einungis virðisaukaskattur.

Að sögn Einars Magnús Magnússonar, upplýsingafulltrúa hjá Umferðarstofu, er hlífðarfatnaðurinn afar mikilvægur fyrir bifhjólafólk og því sé óæskilegt að aðflutningsgjöldin stýri verðinu.

Ragnhildur Hjaltadóttir, ráðuneytisstjóri Samgönguráðuneytisins, segir að verið sé að hefja undirbúning að setningu reglugerðar um hlífðarfatnað bifhjólamanna og í þeirri vinnu verði haft náið samráð við hagsmunaaðila.

Þessu fagnar Valdís Steinarsdóttir og vonast til að samfara þessu falli aðflutningsgjöld niður af nauðsynlegum öryggisfatnaði bifhjólafólks.