Facehunter fílar Ragnhildi Steinunni

Eins og Vísir greindi frá fyrir helgi var tískubloggarinn heimsfrægi Yvan Rodic staddur hér á landi í tengslum við Airwaves hátíðina nú um helgina.

Rodic, sem gengur undir nafninu Facehunter, myndar götutísku og var duglegur að mynda fólk sem vakti athygli hans á förnum vegi og birta af því myndir á bloggi sínu. Þess á milli ræddi hann við helstu hippstera borgarinnar um landsins gagn og nauðsynjar.

Á meðal þeirra sem Rodic fékk að taka myndir af er altmúligmanneskjan og fegurðardrottningin Ragnhildur Steinunn Jónsdóttir. Ragnhildur hefur nokkrum sinnum vakið athygli fyrir athyglisvert val á kæðnaði fyrir ýmsa sjónvarpaða atburði en nú þarf enginn að velkjast í vafa um að Ragnhildur hefur nef fyrir tískunni.

Myndin sem Rodic tók og birti af Ragnhildi fær mikil viðbrög frá lesendum hans sem hrósa bæði klæðnaði Ragnhildar og geislandi útliti. Annars virðast lesendurnir almennt hrifnir af götutískunni í Reykjavík og hrósa þá sérstaklega frumlegheitunum og sköpunargleðinni sem í henni birtist.

Heimasíða Yvan Rodic er facehunter.blogspot.com