Dularfulla hliðshvarfið í Grímsnesi

Lögreglan á Selfossi rannsakar nú mál þar sem hliði sem var á vegi að nokkrum sumarbústöðum í Grímsnesi var stolið. Það var sumarbústaðaeigandi í Grímsnesinu sem kærði þjófnaðinn á hliðinu í gær en hann mun hafa grunað nágranna sinn um að hafa stolið hliðinu. Þeir höfðu deilt um það hvort það ætti að vera uppi eða ekki.

Að sögn lögreglunnar á Selfossi hefur þegar verið rætt við nágrannnann sem kannast ekki við að hafa stolið hliðinu en hann mun hafa vísað á bæjaryfirvöld í málinu. Lögregla segir hins vegar að bæjaryfirvöld stundi það ekki að fjarlægja hlið án þess að láta hlutaðeigandi vita svo málið er enn óupplýst.

Fram kemur í frétt frá lögreglunni á Selfossi að hún fái æ oftar til meðferðar ýmis klögumál á milli aðila í sumarhúsabyggðum. Þar getur verið um ýmiss konar tilvik að ræða eins og til dæmis aðgengi að húsum. Sum þeirra mála hafa endað hjá dómstólum.