Ekki tímabært að breyta skilgreiningu kirkjunnar á hjónabandi

Biskup Íslands telur ekki rétt að skilgreining kirkjunnar á hjónabandi nái einnig yfir sáttmála milli fólks af sama kyni. Hópur presta vill að kirkjan breyti afstöðu sinni til málsins. Við setningu kirkjuþings í dag sagði Björn Bjarnason, dómsmálaráðherra, að rétt væri að leggja embætti kirkjumálaráðherra niður.

Kirkjuþing var sett formlega í Grensáskirkju í morgun en reiknað er með að þingið standi í tæpa viku. Meðal þess sem rætt verður um á kirkjuþinginu er tillaga Karls Sigurbjörnssonar, biskups, um að prestar fái að staðfesta samvist samkynhneigðra. Biskup er vongóður um að tillagan nái fram að ganga.

Nokkur deila hefur staðið um þann hluta tillögu biskups þar sem ítrekað er að þjóðkirkjan standið við skilning sinn á hjónabandi sem sáttmála eingöngu milli karls og konu. Hópur presta vill að þetta verði fjarlægt úr tillögunni. Biskup segir hins vegar ekki tímabært að ganga svo langt.

Á kirkjuþinginu verður einnig skipuð nefnd sem endurskoða á löggjöf um þjóðkirkjuna. Fram kom í ræðu Björn Bjarnasonar við setningu þingsins að hann fagni þessari endurskoðun og að hann telji ennfremur rétt að leggja niður embætti kirkjumálaráðherra og færa málaflokkinn undir forsætisráðuneytið.

Biskup segir umræðuna um tilfærslur ráðuneyta á umræðustig. Hann segist ekki óttast breytingar.