Hætt í flokknum

Trúverðurgleiki Vinstri grænna glataðist þegar Svandís Svavarsdóttir gekk til samstarfs við Framsóknarmenn í Reykjavík að mati Birnu Þórðardóttur. Birna hefur sagt skilið við flokkinn vegna þessa þar sem hún hefur setið sem varamaður í stjórn.

Þetta kemur fram í harðorðuðu bréfi frá Birnu sem birtist í Morgunblaðinu í morgun. Þar lýsir hún upplifun sinni af meirihlutamyndun í borginni og segist hafa orðið um og ó þegar hún heyrði fréttirnar. Í kjölfarið segist Birna hafa sent tölvupóst til Svandísar og Steingríms J. Sigfússonar, formanns flokksins þar sem hún spurði hvort verið sé að bjarga sukkmeistara Reykjavíkur, Birni Inga Hrafnssyni, um borð í nýtt fley. Birna segist gráta yfir glötuðu tækifæri til þess að veita kjósendum færi á að vera stoltir yfir stjórnmálamönnum sem þyrðu að segja nei. Þá segir hún trúverðugleika flokksins hafa glatast og að hann sé erfitt að endurheimta. Orðrétt segir Birna: ,,sú ákvörðun að ganga til samstarfs við holdgerving spillingarinnar án málefnasamnings, án nokkurs fyrirvara er mér ómögulegt að kyngja.".