Gengur ekki að borgin kljúfi samstarfið

Ekki gengur að Reykjavíkurborg kljúfi sig úr samstöðu sveitarfélaga með því að greiða sínum launamönnum bónusa og hærri laun en samningar segja til um, segir Grímur Atlason, bæjarstjóri í Bolungarvík.

Bæjarstjórinn gerir ákvörðun Reykjavíkurborgar um að setja tæpar 800 milljónir í að leysa mannekluvanda borgarinnar að umtalsefni á bloggsíðu sinni. Hann segir það gott að verðlauna eigi fólk sem hefur hvað lægst launin en bera hvað þyngsta bagga en hins vegar sé það alveg á hreinu að ekki gangi að Reykjavíkurborg kljúfi sig úr samstöðu sveitarfélaga með þessum hætti. Grímur segir ríkið hafa dregið lappirnar í samningum um tekjuskiptingu við sveitarfélögin. Þenslusveitarfélag eins og Reykjavík fari létt með að reiða fram 800 milljónir sem skila sér í bættum anda meðal þeirra starfsmanna. Vandinn sé hins vegar sá að að önnur sveitarfélög þurfa að fylgja Reykjavík eftir í hóp ætli þau ekki að dragast aftur úr.