Kallar á breytt viðhorf þjóðkirkjunnar gagnvart samkynheigð

Fyrir kirkjuþingi liggja að þessu sinni nítján mál. Meðal þeirra er tillaga Karls Sigurbjörnssonar, biskups, er leggur til að prestum, sem svo kjósa, verði veitt heimild til að staðfesta samvist samkynhneigðra.

Við setningu þingsins í morgun lagði Pétur Kr. Hafstein, forseti þingsins, áherslu á mikilvægi málsins. Sagði hann ennfremur það vera hlutverk kirkjunnar að tryggja að enginn einstaklingur né hópur finnist hann vera utangáttar á vettvangi kirkjunnar. Sagði hann ljóst að kirkjan þyrfti að horfast í augu við breytt viðhorf samfélagsins gagnvart samkynhneigð og að málið hlyti að ganga fram, fyrr eða seinna.

Í tillögu biskups er þó lagt til að skilningur kirkjunnar á hjónabandi, sem sáttmála milli karls og konu, verði ekki breytt. Í 24 stundum í dag er haft eftir Kristínu Þórunni Tómasdóttur, héraðsprest, að hópur presta telji ekki tímabært að kirkjan setji fram niðurstöðu um skilgreiningu af þessu tagi. Hyggst hún ásamt öðrum prestum koma því til leiðar að þessi hluti í tillögu biskups verði felldur.