Tillögur borgarstjóra í manneklumálum samþykktar

Borgaráð samþykkti á aukafundi í dag tillögur borgarstjóra um að leggja um 790 milljónir króna til aðgerða til að gera Reykjavíkurborg að eftirsóknarverðari vinnustað eins og segir í tilkynningu frá Reykjavíkurborg.

Eins og greint hefur verið frá á að verja 200 milljónum króna í að umbuna starfsmönnum undirmannaðra stofnana, einkum leikskóla, grunnskóla, frístundaheimila og hjúkrunarheimila, vegna álags á yfirstandandi og komandi ári.

Þá mun öllum starfsmönnum borgarinnar standa til boða sextán þúsund króna heilsuræktarstyrkur og sundkort, bókasafnskort, aðgangskort að söfnum borgarinnar og í Fjölskyldu- og húsdýragarðinn.

Þá renna fjármunir til þeirra starfsmanna leikskóla, grunnskóla og hjúkrunarheimila sem skylt er að matast með nemendum eða öldruðum. Þá er gert ráð fyrir markvissum aðgerðum til þess að laða að nýtt fólk til starfa hjá borginni, þar á meðal eldri starfsmenn, starfsmenn af erlendum uppruna og námsmenn.

Mestur hluti upphæðarinnar, eða 680 milljónir króna, fellur til á næsta ári.