Landsbjörg skilji að samkeppnisrekstur og björgunarstarfsemi

Samkeppniseftirlitið hefur lagt fyrir Slysavarnafélagið Landsbjörgu að skilja að fjárhagslega alla starfsemi félagsins sem rekin er í samkeppni við aðila á markaði annars vegar og almenna björgunar- og slysavarnastarfsemi hins vegar.

Kvörtun barst Samkeppniseftirlitinu frá aðila sem keppir við Landsbjörgu um sölu á sjúkra- og öryggisvörum. Sagði í kvörtuninni að Landsbjörg væri að miklu leyti rekin fyrir opinbert fé auk þess sem félagið hefði opinbert einkaleyfi til reksturs spilakassa.

Bent var á að ekki hefði verið skilið fjárhagslega á milli verndaðrar starfsemi Landsbjargar og sölunnar á almennum markaði og að slíkt skekkti samkeppni þar sem keppinautar Landsbjargar í sölu sjúkra- og öryggisvara fengju ekki ríkisstyrki.

Samkeppniseftirlitið tók málið til skoðunar og komst að því að Landsbjörgu bæri að skilja milli starfsemi félagsins sem rekin væri í samkeppni, það er sjúkravöru-, flugelda- og jólatrjáasölu, og björgunar- og slysavarnasamstarfsemi fyrir áramót. Með slíkum fjárhagslegum aðskilnaði ætti að vera tryggt að samkeppnisrekstur Slysavarnafélagsins Landsbjargar væri ekki niðurgreiddur með fé frá þeirri starfsemi samtakanna sem nyti opinberra fjárframlaga.