Um hundrað hafa skilað inn tilboðum vegna lóða í Fossvogi

Um hundrað bjóðendur höfðu skilað inn tilboðum í lóðir sunnan Sléttuvegar í Fossvogi hjá framkvæmdasviði borgarinnar nú undir hádegi, en frestur til að skila inn tilboðum rennur út í dag.

Að sögn Jóns Halldórs Jónassonar, upplýsingastjóra framkvæmdasviðs, segir fjöldi bjóðendanna ekkert til um fjölda tilboðanna því vel geti verið að hver aðili bjóði í fleiri en eina lóðir. Alls eru boðnar út 57 lóðir við Skógarveg og Lautarveg í Fossvogi og verða þær seldar hæstbjóðanda.

Jón Halldór segir að fjöldinn sé í samræmi við reynslu undanfarinna ára af útboði lóða á vegum borgarinnar. Hins vegar búist starfsmenn framkvæmdasviðs við miklu annríki nú eftir hádegið enda komi oft margir á síðustu stundu með tilboð í lóðir.

Skrifstofu framkvæmdasviðs að Skúlatúni 2 verður lokað klukkan 16.15 en síðast í svipuðu lóðaútboði tók tvær klukkustundir til viðbótar að afgreiða alla bjóðendur. Tilboðin verða svo opnuð að viðstöddum bjóðendum í kvöld.