Upplýsingafulltrúi aðstoðar Breiðavíkurdreng

Þór Jónsson upplýsingafulltrúi Kópavogsbæjar segir að hann muni aðstoða Breiðavíkurdrenginn Guðmund Gissurarson við að fá öll gögn sem til eru um hann í skjalasafni Kópavogsbæjar. Fram kom í frétt Vísi í gær að Guðmundur hefði fengið ritskoðaða skýrslu um sig frá barnaverndarnefnd Kópavogs. Þetta var misskilningur því þarna var um að ræða gögn úr fundargerðum nefndarinnar frá árinum 1964 og 1965.

"Ég ræddi við fulltrúa barnaverndarnefndar um mál Guðmundar í morgun og þar kom fram þessi misskilningur," segir Þór í samtali við Vísi. "Um var að ræða fjórar síður af rúmlega 60 úr fundargerðabók frá þessum tíma þar sem Guðmundur kemur við sögu og strikað hafði verið út úr þeim upplýsingar um önnur börn sem ekki endilega voru í Breiðuvík."

Þór segir að hann muni hitta Guðmund að máli á mánudag og fara yfir málið og aðstoða hann við að leita sér upplýsinga. "Það getur verið að djúpt sé á frekari gögnum um Guðmund í skjölum barnaverndarnefndar þar sem langt er um liðið," segir Þór. "Hann mun hinsvegar fá í hendur allt sem við höfum. Það er okkar markmið að greiða götu Breiðavíkurdrengja eins og Guðmundar en ekki að gera þeim gramt í geði."

Guðmundur Gissurarson segir að hann sé ánægður með að hann fái þessa aðstoð við að leita upplýsinga um sig frá verunni í Breiðuvík. "Ég er viss um að frekari gögn en þessar fjórar síður í fundargerðum séu til staðar í skjalahirslum Kópavogs," segir Guðmundur.