Hyggjast setja á fót mannréttindasvið í borginni

Til stendur að stórefla stöðu mannréttindamála í borginni með tilkomu nýs meirihluta og koma á fót sérstöku mannréttindasviði sem heyra mun undir mannréttindaráð sem fagráðs.

Málið var tekið fyrir á fundi borgarráðs í gær en afgreiðslu þess frestað fram til næsta fundar til þess að borgarfulltrúar minnihlutans gætu kynnt sér málið betur. Í tillögu meirihlutans er gert ráð fyrir að stjórnkerfisnefnd vinni tillögu um málið í samráði við mannréttindafulltrúa og mannréttindanefnd borgarinnar.

„Við við viljum stórefla stöðu mannréttindamála, bæði með auknum fjárframlögum og mannauð. Borgin verður að vera áfram í fararbroddi í mannréttindamálum eins og hún var þegar R-listinn fór frá völdum," segir Sóley Tómasdóttir, nýr formaður mannréttindanefndar borgarinnar. Hún segir stefnt að því að mannréttindaráð sem fagráð taki við af mannréttindanefnd og sérstakt mannréttindasvið verði innan stjórnkerfis borgarinnar. Nú eru níu fagráð í borginni sem meðal annars snúa að skipulagsmálum, leikskólamálum og menntamálum.

Sóley bendir á að eitt af síðustu verkum R-listans hafi verið að samþykkja mannréttindastefnu fyrir borgina. Hún kveði á um fjölmörg verkefni sem enn hafi ekki verið sinnt. Það verði að taka betur tillit til minnihlutahópa við ákvarðanatöku hjá borginni.

Þá bendir hún á að einn mannréttindaráðgjafi sinni nú níu skilgreindum minnihlutahópum hjá borginni og 24 milljónir hafi verið veittar til mannréttindamála. Það sé hreinlega ekki nóg og nýr meirihluti vilji gera betur. Hún vilji leggja áherslu á kynjaþáttinn þannig að karlar og konur komi jafnt að ákvarðanatöku hjá borginni. „Mikilvægustu verkefnin eru forvarnir og fræðsla og ég tel að það sé verkefni borgarinnar að ala upp víðsýnna fólk fyrir framtíðina," segir Sóley.

Hún vonast til að stefnumótun og málefnavinnu vegna breytinganna verði lokið fyrir áramót.