Olíuleit við Jan Mayen í engu samræmi við stefnu Íslands

Það stangast á við stefnu Íslands í loftlagsmálum að hefja olíuleit á Drekasvæðinu við Jan Mayen að mati Árna Finnssonar, formanns Náttúruverndarsamtaka Íslands. Hann segist vera sammála norsku náttúruverndarsamtökunum í málinu. Fram kom norska ríkissjónvarpinu í gær að bæði norsku náttúruverndarsamtökin og norska umhverfisstofnunin telji að olíuvinnsla á svæðinu geti stefnt lífríkinu þar í hættu.

„Samtökin hafa ekki fjallað um þetta mál sérstaklega," sagði Árni Finnsson, formaður Náttúruverndarsamtaka Íslands, í samtali við Vísi. „Að mínu mati er það hins vegar ekki í neinu samræmi við þá stefnu Íslands að draga úr losun gróðurhúsaloftegunda að fara að leita að olíu á hafsvæðinu við landið."

Í norska ríkissjónvarpinu í gær var haft eftir Lars Haltbrekken, talsmanni norsku náttúruverndarsamtakanna, að hann telji varhugavert að Íslendingar hefji olíuvinnslu við Jan Mayen. Óttast hann að það kunni að stefna lífríki á svæðinu í hættu. Segist hann ennfremur ætla að leitast eftir samstarfi við íslensk náttúruverndarsamtök til að koma í veg fyrir að olíuvinnsla hefjist.

Árni segist ekki hafa heyrt í Haltbrekken vegna málsins. „Við munum hins vegar taka vel í beiðni Haltbrekken."