Björn Ingi stakk rýting í bak borgarstjóra

Þorgerður Katrín Gunnarsdóttir menntamálaráðherra segir í grein í Morgunblaðinu í dag að Björn Ingi Hrafnsson hafi kosið að stinga rýtingi í bak fyrrum borgarstjóra Vilhjálms Vilhjálmssonar.

Þorgerður Katrín segir að Björn Ingi hafi sett sjálfstæðismönnum í borgarstjórn afarkosti í REI-málinu. "Annað hvort myndu þeir styðja REI-málið alla leið eða að meirihlutasamstarfinu yrði slitið," segir Þorgerður Katrín.

Menntamálaráðherra segir að borgarfulltrúar Sjálfstæðisflokksins hafi sem betur fer haft kjark til að standa í lappirnar. "Það gat Björn Ingi ekki sætt sig við og kaus að stinga rýting í bakið á borgarstjóra sem hann hafði áður fullvissað með faðmlagi um að meirihlutasamstarfið væri í traustum og góðum farvegi."