Dómur yfir fyrrverandi starfsmanni ÍE þyngdur

Hæstiréttur dæmdi í dag fyrrverandi starfsmann Íslenskrar erfðagreiningar, Jesus Sainz, í sex mánaða skilorðsbundið fangelsi fyrir ólöglega afritun á gögnum í eigu ÍE.

Héraðsdómur Reykjavíkur hafði í febrúar síðastliðnum dæmt Sainz í tveggja mánaða fangelsi, skilorðsbundið til tveggja ára, fyrir sama brot. Honum var gefið að sök að hafa á tveggja vikna tímabili í júni 2006 afritað í heimildarleysi 29 skrár af netþjóni ÍE.

Forsvarsmenn Íslenskrar erfðagreiningar sögðu að skrárnar geymdu hver um sig umtalsvert safn upplýsinga sem væru afrakstur verulegra fjárfestinga ÍE. Með dómi Héraðsdóms Reykjavíkur í febrúar síðastliðnum var sakfellt fyrir brot af þessu tagi í fyrsta sinn í íslenskri réttarsögu.