Fá bara inni á frístundaheimili þrjá daga í viku

Börnin á frístundaheimilinu í Vesturhlíð fara ekki varhluta af þeirri manneklu sem nú er á frístundaheimilum borgarinnar. Vesturhlíð er frístundaheimili fyrir krakkana í Öskjuhlíðarskóla og nú er svo komið að börnin fá flest bara inni á frístundaheimilinu þrjá daga vikunnar. „Það vantar helling af fólki hjá okkur ennþá," segir Heiður Baldursdóttir í Vesturhlíð. Hún segir mun erfiðara fyrir börnin í Vesturhlíð að takast á við óstöðugleikann sem fylgir manneklunni en fyrir krakka sem ekki búa við fötlun af neinu tagi.

„Þessir krakkar fara ekkert á skólalóðina eftir skóla og hitta þar vini sína," segir Heiður en Vesturhlíð er í raun eini samkomustaður barnanna eftir að skólatíma lýkur. Að hafa starfssemina í lagi skiptir því að mínu mati meira máli fyrir þessi börn en önnur," segir Heiður, „enda þurfa mörg þeirra mjög skipulagða rútínu. Krakkarnir höndla þetta illa og oft eru þau mjög sár yfir því að fá ekki að koma hingað."

Börnin í Vesturhlíð eru 76 talsins á þremur deildum og að mati Heiðar þyrfti að bæta við um 20 starfsmönnum á heimilið á hverjum degi til þess að koma rekstrinum í samt lag. Samtals á þessum þremur heimilum eru 76 börn á grunnskólaaldri.

Heiður segir að á morgun föstudag, gefist almenningi og fjölmiðlum kostur á að kynna sér hið þróttmikla starf sem fram fer í Vesturhlíð þegar blásið verður til Vetrarhátíðar. „Það hefur verið mikil umræða um mannekluna á leikskólum og frístundaheimilum og mikið af fréttum á neikvæðu nótunum. Þess vegna datt okkur í hug að bjóða fólki að koma hingað á morgun á milli klukkan 15 og 17 til þess að sýna fram á að þetta er í raun og veru skemmtilegasta starf í heiminum," segir Heiður Baldursdóttir í Vesturhlíð.

Öllum er frjálst að koma og kynna sér starfið en auk þess buðu starfsmennirnir stjórnamönnum í ÍTR, Degi B. Eggertssyni borgarstjóra og Jóhönnu Sigurðardóttur félagsmálaráðherra sérstaklega til samkomunnar.