Jafnréttisráðherra Noregs kynnir sér fæðingarorlof á Íslandi

Karita Bekkemellem, jafnréttisráðherra Noregs, kemur hingað til lands í næstu viku til þess að kynna sér nánar fæðingarorlof hér á landi og barnaverndarmál.

Fram kemur á vef félagsmálaráðuneytisins að Jóhanna Sigurðardóttir félagsmálaráðherra hafi fundað með öðrum jafnréttisráðherrum í upphafi vikunnar í Helsinki. Þar var íslenska leiðin í fæðingarorlofsmálum, þar sem réttindi feðra er ekki hægt að flytja yfir til móður, rædd ítarlega og sagði jafnréttisráðherra Finnlands að sú leið væri mikilvæg til að auka þátttöku feðra í uppeldi barna. Bent er 90 prósent feðra hafi nýtt sér rétt til fæðingarorlofs og að meðaldagafjöldi þeirra sé 97 dagar. Slíkt eig sér ekki hliðstæður, hvorki á Norðurlöndum né í Evrópu.

Ýmsar hugmyndir eru uppi um aðgerðir í hinum norrænu ríkjunum til þess að fá ferður til að taka þátt í fæðingarorlofi, þar á meðal lagabreytingar og sérstakar auglýsingar og fræðsluefni.

Ísland eitt með miðlægan Fæðingarorlofssjóð

Fram kemur á vef félagsmálaráðuneytisins að Ísland hafi sérstöðu varðandi fjármögnun og afgreiðslu fæðingarorlofsins því annars staðar á Norðurlöndum sé ekki miðlægur Fæðingarorlofssjóður. Í Finnlandi, svo dæmi sé, tekið er það vinnuveitandinn sem greiðir orlofið og er kostnaður atvinnugreina af fæðingarorlofinu því afar mismunandi.

Félagsmálaráðherra undirstrikaði mikilvægi samþættingar fjölskyldu- og atvinnulífs og upplýsti á fundinum að til stæði að lengja fæðingarorlofið og auka þannig enn frekar hlut feðra í umönnun ungra barna. Ráðherra upplýsti einnig um fyrirhugaðar aðgerðir í jafnlaunamálum en fram kom að stöðnun hefur ríkt í þessum málum á Norðurlöndunum undanfarin 10-20 ár.

Fyrirtæki undir stjórn kvenna skila meiri arði