Fjórir af hverjum fimm telja útvarpsstjóra ofalinn

Liðlega áttatíu prósent þátttakenda í netkönnun Vísis telja að laun Páls Magnússonar útvarpsstjóra séu of há.

Laun hans voru nærri tvöfölduð fyrr á árinu þegar Ríkisútvarpið varð að opinberu hlutafélagi og hefur hann nú um eina og hálfa milljón króna í laun á mánuði. Það er um hálfri milljón króna meira en forsætisráðherra.

Könnunin fór fram á Vísi frá klukkan fjögur í gærdag til hádegis í dag og tóku um 2500 manns þátt í henni. 80,6 prósent telja launin of há fyrir útvarpsstjórann en 19,4 eru á öndverðum meiði. Tekið skal fram að aðeins var hægt að greiða einu sinni atkvæði í hverri tölvu.