Kannað verði hvernig framsóknarmenn högnuðust á VÍS

Sverrir Hermannsson fyrrverandi bankastjóri Landsbankans vill að rannsókn verði gerð á því hvernig ákveðnir Framsóknarmenn högnuðust óeðlilega á kaupum hlutabréfa Landsbankans í VÍS á sínum tíma.

Sverrir dregur ekki dul á það í viðtali við fréttastofuna að svonefndum S-hópi, sem kenndur er við Framsóknarflokkinn, hafi nánast verið gefin þessi hlutabréf.

Í grein sem hann ritar í Morgunblaðið í morgun segir Sverrir að söluverð bréfanna hafi verið 6,8 milljarðar króna en að seljendur hafi selt þau á röskan 31 milljarð aðeins þremur árum síðar. Með 25 milljarða gróðann kaupi þeir svo flugfélög, leggi undir sig sjóði Samvinnutrygginga upp á 30 milljarða og séu nú í hópi þeirra sem gera tilraun til að ná undir sig orkuauðlindum Íslands.

Sverrir nefnir þarna einkum Finn Ingólfsson og Helga S. Guðmundsson til sögunnar sem skúrka Framsóknarflokksins í skjóli Halldórs Ásgrímssonar.