Litlar líkur á að vatnsból Reykvíkinga mengist

Afar litlar líkur eru á því að vatnsból Reykjavíkur geti mengast á svipaðan hátt og gerðist í Osló að sögn Arnar Sigurðssonar, sviðsstjóra umhverfissviðs Reykjavíkurborgar. Hann segir mikið eftirlit vera viðhaft með neysluvatni hérlendis.

„Hættan á svipaðri mengun hér er mjög lítil," sagði Örn Sigurðsson, settur sviðsstjóri umhverfissviðs, í samtali við Vísi. „Það er mikið eftirlit í gangi og ég veit ekki til þess að við höfum nokkurn tíman þurft að glíma við svona mál."

Hættulegt sníkjudýr fannst í gær í drykkjarvatni frá vatnsveitu sem sér um 80 prósent Oslóborgar fyrir vatni. Íbúar þurfa að minnsta kosti að bíða tvær vikur áður en þeir geta neytt drykkjarvatns beint úr krana. Fólki er millitíðinni ráðlagt að sjóða allt vatn í þrjár mínútur fyrir neyslu.

Örn segir líkur á mengun af þessu tagi vera meiri þar sem vatnsból eru ofanjarðar. Allt neysluvatn Reykvíkinga komi hins vegar úr borholum sem útilokar að yfirborðsvatn og mengun komist í vatnsbólið.