Matvælaeftirlit undir eina stofnun

Til stendur að koma á fót sérstakri stofnun, Matvælaeftirlitinu sem heyra mun undir sameinað sjávarútvegs- og landbúnaðarráðuneyti og tekur við verkefnum sem Landbúnaðarstofnun, Umhverfisstofnun og Fiskistofa hafa sinnt. Þetta kemur fram í stjórnarfrumvarpi sem lagt hefur verið fram á Alþingi um breytta verkaskiptingu ráðuneyta.

Fram kemur í frumvarpinu að markmið breyttrar verkaskiptingar sé að hagræða og einfalda stjórnsýslu. Allt matvælaeftirlit verður flutt undir Landbúnaðarstofnun og lagt til að stofnunin fái heitið Matvælaeftirlitið. Það á að annast opinber eftirlit með flutningi matvæla, innflutningi landbúnaðarafurða, búfjársjúkdómum, skoðun á sláturafurðum og eldisfiski og með meðferð, flutningi, geymslu, vinnslu og dreifingu sjávarafurða, að undanskilinni smásölu. Með því að sameina matvælaeftirlit á einn stað er ætlunin að bæta eftirlitið og jafnframt efla samkeppnisstöðu og orðspor íslenskrar matvælaframleiðslu á mörkuðum, eins og segir í frumvarpinu.

Meðal breytinga á verkaskiptingu sem þegar hafa verið samþykktar er að sameina landbúnaðarráðuneyti og sjávarútvegsráðuneyti, breyta Hagstofunni úr ráðuneyti í stofnun og breyta nöfnum heilbrigðis- og tryggingamálaráðuneytisins og félagsmálaráðuneytisins samfara því að lífeyristryggingar og félagslegar bætur færast til félagsmálaráðuneytisins. Þá hafa iðnaðarráðuneyti og viðskiptaráðuneyti verið aðskilin.

Enn fremur verða sveitarstjórnarmál flutt frá félagsmálaráðuneyti til samgönguráðuneytis, ferðamál frá samgönguráðuneyti til iðnaðarráðuneytis auk þess sem landbúnaðarskólar færast frá landbúnaðarráðuneyti til menntamálaráðuneytis.

Landgræðsla og skógrækt annars vegar og vatnamælingar hins vegar flytjast enn fremur frá landbúnaðarráðuneyti og iðnaðarráðuneyti til umhverfisráðuneytis enda er þar um málaflokka að ræða sem eru mjög nátengdir öðrum verkefnum umhverfisráðuneytisinsm, eins og segir í frumvarpi ríkisstjórnarinnar. Ræktun nytjaskóga verður hins vegar undanskilin þessum flutningi.